لاک ڈاؤن کے باعث دنیا بھر میں آن لائن شادیوں کی شرح میں اضافہ، پاکستانی اس سہولت سے کیسے فائدہ اٹھا سکتے ہیں؟

کرونا وائرس کے پھیلاؤ نے دنیا بھر کے طرز زندگی میں بڑی تبدیلی کر دی ہے وہ دنیا جہاں پر بڑے بڑے اجتماع اور اجلاس کرنا ضروری خیال کیا جاتا تھا وہاں پر اب کاروبار زندگی اور حکومت چلانے کے لیے بھی آن لائن اقدامات کیے جارہے ہیں- لوگ آن لائن خریداری کر رہے ہیں یہاں تک کہ حکومتی اجلاس بھی آن لائن کیے جا رہے ہیں- ایسے حالات میں جب کہ شادیوں کے اجتماعات پر بھی پابندی عائد ہے بہت سارے والدین اس پریشانی میں مبتلا ہیں کہ ان کے بچوں کی شادیوں کے تمام انتظامات مکمل ہیں مگر لاک ڈاؤن کے سبب وہ اس شرعی فریضے کو بھی مؤخر کرنے پر مجبور ہیں- اس صورت میں پاکستانی اگر چاہیں تو وہ بھی آن لائن شادی کی سہولت سے اسی طرح فائدہ اٹھا سکتے ہیں جس طرح دنیا بھر کے لوگ اس سہولت سے فائدہ اٹھا رہے ہیں- آن لائن شادی آن لائن شادی سے مراد ایسا نکاح ہے جس میں لڑکے کا اور لڑکی کا ایک ہی جگہ پر موجود ہونا ضروری نہیں ہے اور وہ انٹرنیٹ کی سہولت کا استعمال کرتے ہوئے آن لائن ایجاب و قبول اپنے وکیل اور نکاح خواں کی موجودگی میں کر سکتے ہیں اور فقہ حنفی کے مطابق ان کا یہ نکاح شرعی طور پر درست تصور کیا جاتا ہے اور اس میں کوئی قباحت نہیں ہے-   آن لائن شادی کا طریقہ کار آن لائن شادی ان مرحلوں پر مشتمل ہوتی ہے -اس طریقہ کار کے لیے ایک وکیل کی ضرورت ہوتی ہے جس کو لڑکے اور لڑکی کے شناختی کارڈ کی کاپی آن لائن مہیا کر دی جاتی ہے- اس کے بعد وکیل ایک مقررہ تاریخ اور وقت کا انتخاب کر لیتا ہے جس میں وکیل ، لڑکا اور لڑکی ویڈيو کال پر ایک وقت میں موجود ہوسکیں اس کے ساتھ ساتھ ایک نکاح خواں کا بھی انتظام کیا جاتا ہے جو کہ آن لائن خطبہ نکاح پڑھتا ہے- اور اس کے بعد لڑکی اور لڑکے کی جانب سے آن لائن موجود گواہوں کے سامنے ایجاب و قبول کرواتا ہے- اس موقع پر وکیل کا ہونا بھی ضروری ہے کیوں کہ اسی وکیل نے اس نکاح کو نہ صرف رجسٹر کروانا ہوتا ہے بلکہ دیگر ضروری قانونی کاروائی بھی وہی کرواتا ہے- مقررہ تاریخ پر دونوں فریقین اپنے اپنے گواہوں اور دولہا دلہن کے ساتھ کانفرنس کال پر آن لائن آجاتے ہیں اور وکیل کی جانب سے پہلے سے مہیا کیے گئے نکاح ناموں پو زبانی ایجاب و قبول کے ساتھ ساتھ دستخط بھی کر دیتے ہیں اور یہ کاغذات اسکین کروا کر وکیل کے حوالے کر دیے جاتے ہیں تاکہ وہ آئندہ کی کاروائی کر سکے- اور اس کے بعد ان تمام کاغذات کو یونین کونسل سے اور نادرا کے دفاتر سے آن لائن رجسٹر کروایا جاتا ہے- اس طرح لاک ڈاؤن کے دنوں میں بھی آسانی سے آن لائن شادی کی جا سکتی ہے-   آن لائن شادی کے فوائد آن لائن شادی کے بہت سارے فوائد ہیں اس کے لیے ضروری نہیں ہے کہ لڑکا اور لڑکی ایک ہی شہر یا ملک میں ہوں دور پار رہتے ہوئے بھی اس کا اہتمام کیا جا سکتا ہے- اس کے ساتھ ساتھ غیر ضروری اخراجات جو کہ ہم نے شادی بیاہ کی رسومات کے نام پر کر دیا ہے اس سے بھی جان چھڑائی جا سکتی ہے- نکاح کے اس عمل میں آن لائن زیادہ سے زیادہ لوگوں کو شامل کیا جا سکتا ہے اور آسانی سے اس عمل کو انجام دیا جا سکتا ہے-